Vrou wat Alec Baldwin 'teister' verloor teenbewyse
2012-10-19 14:30
Montreal – Die Kanadese aktrise Genevieve Sabourin, wat daarvan beskuldig word dat sy die Amerikaanse ster Alec Baldwin geteister het, kon nie toegang kry tot waardevolle bewyse op Facebook wat haar glo kan help om die bewerings teen haar verkeerd te bewys nie.
Die aktrise het glo gehoop om Facebook-gesprekke met Baldwin te gebruik om die bewerings teen haar te weerlê.
"Ek sal (op 27 November) voor 'n jurie in New York verskyn sonder my bewyse. Ek wonder watter kans het ek op 'n regverdige verhoor," het sy Donderdag aan AFP gesê.
Baldwin het vroeër vanjaar aanklagte teen Sabourin aanhangig gemaak omdat sy na bewering e-posboodskappe aan hom gestuur het wat hom vra om met haar te trou, en ook sonder uitnodiging by sy woonstel in Manhattan opgedaag het.
Sabourin, wat op 8 April in hegtenis geneem is en vir 36 uur aangehou is, het gesê die bewerings van teistering is gemaak weens 'n "misverstand."
Sy het gesê rekords van hulle Facebook-boodskappe bewys dat hy ook in haar belang gestel het.
"Toe ek gesien het hy is betrokke by iemand anders, het ek besluit om ons verhouding op Facebook te kanselleer, en as gevolg daarvan het ek al ons Facebook-gesprekke verloor."
Sy het gesê sy en haar regsverteenwoordiger het vergeefs probeer om die boodskappe by Facebook te kry.
"My persoonlike en professionele reputasie is heeltemal vernietig," het die 40-jarige aktrise gesê.
– Volg Nuus24 op Twitter.
- SAPA
