Vrou verloor duisende in George Clooney-slenter

2012-10-19 12:30

Taipei – 'n Taiwannese vrou wat gedink het sy het 'n aanlyn-verhouding met die akteur George Clooney het 1,4 miljoen  Taiwannese dollar (sowat R414 000) in 'n beweerde Nigeriese slenter verloor, is Vrydag berig.

Die 29-jarige Yang Nien-tzu het aan die polisie gesê sy het in Maart 'n buitelander, wat gesê het hy is Clooney, in 'n kletskamer ontmoet. Die twee het toe 'n verhouding begin.

Sy het gesê die man het presies soos die Hollywood-ster geklink toe hulle oor die telefoon gepraat het, en het selfs om verskoning gevra vir die bekommernis nadat hy voor Soedan se ambassade in Washington in hegtenis geneem is.

Die regte Clooney is in Maart in hegtenis geneem tydens 'n betoging buite die ambassade.

Die slenter is oopgevlek toe "Clooney" haar gevra het om geld aan hom in Nigerië, waar hy liefdadigheidswerk vir die Verenigde Nasies doen, oor te betaal.

Die polisie het Yang in April begin ondersoek nadat sy probeer het om vervalste reisigerstjeks ter waarde van VSA$10 000 (sowat R86 000) by 'n plaaslike bank te wissel.

Yang het gesê die tjeks was vergoeding van haar superster-kêrel.

Die polisie het Donderdag alle aanklagte teen haar teruggetrek nadat dit aan die lig gekom het dat sy die slagoffer was van 'n slenter.

– Volg Nuus24 op Twitter

- Sapa-DPA