Vrou sê Steve is kind se pa
2010-01-17 07:23
’n Vrou van KwaZulu-Natal glo vas Steve Hofmeyr is die pa van haar 12-jarige
dogter en sy wil nou bo alle twyfel vasstel of dit so is of nie.
Me. Liezl Hayward (37) van Palm Beach het in ’n telefoniese gesprek met
Rapport beweer die sanger ignoreer haar versoeke om ’n DNS-toets te ondergaan.
“Steve kan dit nie ontken nie – hy ís die pa van my 12-jarige dogtertjie, Lizé,”
sê sy.
Sy het Woensdag ’n SMS aan Rapport gestuur waarin sy die bewering oor Steve
se vaderskap maak en dit later in telefoniese gesprekke herhaal.
As dit waar is, sal dit Steve se sesde kind wees.
Hayward sê sy en die popster het destyds nie ’n vaste verhouding gehad nie,
maar wel gereeld seks gehad. “As jy na die datums kyk, is Steve die pa.”
Steve het drie buite-egtelike kinders – Charissa, Armand en Devon.
Steve het ook twee seuns, Sebastian en Benjamin, uit sy huwelik met Natasha
Sutherland wat op die rotse geloop het.
Hy het volgens Hayward dikwels vir haar geskenkies gegee, maar geweier om ’n
vaderskaptoets te laat doen wanneer sy daarom gevra het.
“Hy het gereeld hier R10 000 en daar R20 000 inbetaal, maar ek het nie meer
die bewyse nie.”
Volgens haar het sy foto’s, dokumente en ander aandenkings “in ’n oomblik van
woede” vernietig.
Sy beweer voorts Steve het dié Kersfees vir Lizé ’n geskenk van R1 000 gegee
– maar die kind weet nie dit kom van die sanger of dat hy na bewering haar pa is
nie.
Hayward het met haar voormalige man, André, getrou toe Lizé net agt maande
oud was.
“Sy is grootgemaak met die idee dat André haar pa was. Hy was ’n moeilike man
en sou my te lyf gegaan het as hy uitgevind het Lizé kon Steve se kind wees.”
Haar gewese man is ná hul egskeiding oorlede en sy voel sy kan nou maar
daaroor praat.
Sy sê sy het sowat twee weke gelede per SMS met Steve gesels.
“Ons het sommer net oor gewone goed gechat, maar ek weet nie tans waar ek met
hom staan nie – hy is baie stil.”
Sy het glo verlede jaar vir Steve per SMS gevra om ’n DNS-toets te ondergaan
om bo alle twyfel vas te stel of hy die pa is, maar hy het nie daarop geantwoord
nie.
“Wanneer ek hom gebel het, het hy nie reply nie.”
Lizé woon tans by haar eksman se weduwee omdat Hayward haar glo nie geldelik
kan onderhou nie.
Hayward sê sy en Steve het mekaar ontmoet toe sy 15 jaar oud was en hulle
oorkant mekaar in Moreletapark in Pretoria gewoon het.
“Dalk is Steve nie die pa nie, maar ek soek net closure. Dat ek kan aangaan
met my lewe en dat Lizé miskien kan terugkom na my toe.”
Steve is tans aan boord van die MSC Sinfonia en kon nie vir kommentaar bereik
word nie.
Me. Amanda Singleton, ’n vriendin van Steve, het egter by navraag aan Rapport
gesê elke tweede meisie wil Steve se “vriendin” wees.
“As sy so graag ’n DNS-toets wil hê – dagvaar hom dan.”
-
Rapport