Vierde Rodriguez-konsert bygevoeg

2013-01-11 10:57

Kaapstad – Big Concerts het aangekondig dat die immergewilde sanger en liedjieskrywer Rodriguez in Februarie weens die oorweldigende vraag 'n ekstra konsert in Kaapstad sal hou.

Die ekstra vertoning is bygevoeg ná die kaartjies vir sy drie ander vertonings in Kaapstad uitverkoop is.

Die vierde vertoning sal op Saterdag, 9 Februarie plaasvind, en sal nou sy eerste konsert in Kaapstad wees.

Kaartjies vir die ekstra vertoning is beskikbaar op Big Concerts se webwerf, of by enige Shoprite, Checkers of Computicket.

Rodriguez sal ook in die Big Top Arena by Carnival City in Johannesburg verskyn op 12, 13, 15, 16 en 18 Februarie. Al die kaartjies vir dié vertonings is reeds uitverkoop.

Die Mexikaans-Amerikaanse sanger se debuutalbum, Cold Fact, is destyds deur die apartheidsregering verban.

– Lees hier meer.

– Volg Nuus24 op Twitter.