Verpleegster pleeg selfmoord ná Kate-fopoproep
2012-12-08 08:10
Sydney, Australië – Die verpleegster wat 'n fopoproep beantwoord het by die hospitaal waar Catherine, hertogin van Cambridge, behandel is, het selfmoord gepleeg.
King Edward VII se hospitaal het Woensdag erken dat hy 'n fopoproep van ‘n Australiese radiostasie ontvang het.
Die twee omroepers wat die oproep gemaak het, is intussen van die lug gehaal.
Jacintha Saldanha het die telefoon beantwoord toe omroepers van Sydney se 2Day FM gebel het en die stem van koningin Elizabeth II en prins Charles nagemaak het. Saldanha het toe die telefoon aan 'n kollega gegee en dié het toe inligting oor Catherine se gesondheid aan hulle verskaf.
Saldanha se lyk is Vrydag gevind en die polisie het gesê haar dood word nie as verdag beskou nie. Die hospitaal weier om kommentaar te lewer op mediaberigte dat sy selfmoord gepleeg het.
Die radiostasie het Saterdag gesê die omroepers, Mel Greig en Michael Christian, is "albei diep geskok" oor die nuus van die verpleegster se dood.
2Day FM en sy eienaars, Southern Cross Austereo, het in 'n verklaring gesê die radiostasie en die omroepers "het besluit dat hulle uit respek vir wat as 'n tragedie beskryf kan word, nie na hul radioprogram sal terugkeer nie".
"Ons innige meegevoel aan haar familie en diegene wat wêreldwyd deur die situasie geraak word."
Kort nadat die nuus van die verpleegster se nuus versprei het, is die radiostasie se Facebook-blad oorval met kommentaar van duisende mense wat vra dat die omroepers afgedank moet word.
Julia Gillard, Australië se premier, het die verpleegster se dood as 'n verskriklike tragedie beskryf.
Greig en Christian het kort ná die oproep om verskoning gevra en 'n skakel na die fopoproep en die omroepers se Twitter-profiele is verwyder.
– Volg Nuus24 op Twitter
- AFP
