Vere waai oor SA se eie Gangnam-video
2012-11-17 08:20
Video - Gangnam Style... in Afrikaans
Die Afrikaanse kunstenaar Dirk van der Westhuizen het sy eie weergawe van die wêreldwye treffer "Gangnam Style" bekendgestel.
KYK
Johannesburg – Die Pretoriase sanger wat vroeër vandeesweek sy liedjie “Supercool” op YouTube geplaas het, het gesê hy sal hom nie laat onderkry deur negatiewe kommentaar nie, berig Beeld.
Van der Westhuizen (22) het oornag ietwat van ’n sensasie geword nadat die video van sy liedjie “Supercool” onder meer op die webblad Gevaaalik.com uitgewys is.
Die video, wat Woensdag op YouTube geplaas is, is teen Saterdagoggend meer as 57 000 keer gekyk.
Van der Westhuizen het gesê hy is verbaas oor al die negatiewe kommentaar.
“Dit was oorspronklik net ’n fun-ding. Ek dink baie mense het net daarna gaan kyk omdat hulle my haat sonder dat hulle my of my musiek ken.
“Dit (die kommentaar) het nog nie regtig ingesink nie. Ek dink nie mense besef wat hulle sê nie.”
In die video sing hy gedeeltes van die aanlyntreffer “Gangnam Style” van die Koreaanse popster PSY en voer ook van PSY se danspassies uit.
Daar is al meer as 700 miljoen keer na die oorspronklike “Gangnam Style” op YouTube gekyk.
Pierre van der Westhuizen (nie familie nie) van sy platemaatskappy, Maroela Musiek, het gesê hulle het op die verwysing na “Gangnam Style” besluit omdat dit “so goed pas by Supercool”.
Al is daar mense wat hom aanmoedig om van ’n dak af te spring, het Dirk gesê dit sal sy sangloopbaan beslis nie kelder nie.
“Ten minste is my naam nou op almal se lippe.”
Tog verkies hy in die lig van sommige van die dreigemente om nie nou te sê waar sy optrede Saterdag sal wees nie.
– Lees meer hier
– Volg Nuus24 op Twitter
