Vere waai oor Nando's-advertensie

2012-06-03 09:45

Kaapstad – Die SABC het geweier om die kitskosreus Nando’s se nuutste advertensie teen xenofobie uit te saai.

Die minuut lange video, wat reeds op sosiale netwerke versprei is, sou Vrydagmiddag op SABC 2 uitgesaai word.

Die video is teen Sondagoggend reeds meer as 76 000 keer gekyk.

Die SABC het Nando's laat Donderdag in kennis gestel dat hy nie die advertensie gaan uitsaai nie omdat dit die Wet op Elektroniese Kommunikasies en Transaksies en die kode van die advertensiestandaarde-owerheid (ASA) verontagsaam.

Die advertensie bemark twee nuwe produkte.

Mark Radomsky, 'n direkteur van Nando's, het die uitsaaier daarvan beskuldig dat hy sensuur toepas op die maatskappy se reg op vryheid van uitdrukking.

Radomsky het gesê die doel van die advertensieveldtog is om die kwessie van xenofobie aan te spreek.

Die maatskappy het verder in 'n verklaring gesê die SABC het versuim om skriftelik te reageer en ASA het bevestig dat die advertensie nie sy kode verontagsaam nie.

Kaizer Kganyago, woordvoerder van die SABC, het Saterdag gesê die advertensie is weens "xenofobiese ondertone" onttrek.

ASA kon nie vir kommentaar bereik word nie.

Kyk hier na die video:



– Lees meer hier

– Volg Nuus24 op Twitter