Valiant praat oor sy toorwoorde
2011-06-14 11:19
Kaapstad - Valiant Swart, die blues-sanger van Stellenbosch ook bekend as die Mystic Boer, het in Maart ‘n digbundel van al sy lirieke bekendgestel.
Dit staan bekend as Toorwoorde Roep My en bevat die lirieke in digvorm vanaf sy heel eerste CD tot en met die nuutste een saam met Ollie Viljoen.
Dit is iets wat hom al vir jare na aan die hart lê en wat hy wou doen sedert hy verstand het, het hy tydens ‘n onderhoud by sy huis in Stellenbosch aan Nuus24 gesê.
“Ek wou nog altyd graag ‘n digbundel uitgee, maar my digwerk manifesteer toe in lirieke.
“Ek is so ‘n ruk terug genader deur die uitgewers, wat gevra het of ek nie ‘n boek wil skryf oor die afgelope 20 jaar van my loopbaan nie. Dan kan ek tussenin van my lirieke plaas.
“Ek kom toe agter dat net die lirieke alleen reeds baie is en dat die biografie-tipe boek heeltemal te veel tyd gaan neem, wat ek nie op die oomblik het nie. Eindelik het ons toe besluit dat net die lirieke alleen ook ‘n goeie idee is... en daar is hy. Nou het ek hom.”
Omdat die boek juis fokus op die woorde, op die liriek as gedig, het hy nie bladmusiek by die liedjies gesit nie. Hy wou dit nie ‘n liedjieboek maak nie omdat akkoorde en musiek volgens hom die leesproses van die lirieke self belemmer.
Dit het in dié geval vir hom spesifiek gegaan oor die teks, het hy verduidelik.
“Die titel kom uit een van my liedjies, Oos Wes Wals, uit. Dit het net reg gewerk en die regte betekenis vir my gehad.”
Dit is duidelik dat sy aanhangers ook van die boek hou.
“Het die fantastiese nuus gekry dat die eerste oplaag van Toorwoorde Roep My uitverkoop is. Lekker brag ek nou,” het Valiant Maandag op sy Facebook-blad geskryf.
As alles goed gaan en Valiant genoeg tyd kry hierdie jaar, behoort hy in 2012 ‘n nuwe CD uit te bring, het hy gesê.
“Ek het ‘n klomp liedjies wat hier rond lê. Ek sit met ‘n paar lekker idees in my kop. Ek dink teen volgende jaar sal ek weer ‘n rock and roll-, country- en blues- Valiant Swart-CD uitbring,” het hy gesê.
Op sy laaste twee CD’s het hy saam met Ollie Viljoen gewerk.
“Ek het geweet die mense wat regtig hou van die soort musiek wat ek maak, sal waardering daarvoor hê. Hulle sal daarvan hou.
“Baie van my aanhangers het na my toe gekom en gesê van die songs op die CD’s kon net sowel Valiant Swart-songs gewees het. En daarmee het ek net bewys dat my musiek nie soveel verskil van iemand soos Ollie Viljoen, wat ‘n generasie of wat ouer as ek is, se soort musiek nie.”
Vir meer as twee dekades reeds vermaak Valiant Swart gehore oor die land heen.
Verlede jaar het hy twintig jaar in die bedryf gevier met ‘n huldeblyk-konsert wat vir hom by OppiKoppi gehou is. Toorwoorde Roep My herdenk in ‘n mate sy ‘mondigwording,’ en daar is nog baie lewe in sy oë.
“Die bedryf hou ‘n mens jonk, man. Ek voel nie oud nie. Ek lyk nie oud nie. So ek sal nog vir lank rock and roll.”
- Besoek Valiant Swart se webtuiste en Facebook-blad vir meer inligting.
- Volg Nuus24 op Twitter.