U2 konsert: ‘Gestremdes moet net f*k*f!’
2010-12-18 09:02
Beeld
Johannesburg - “Gestremdes moet ‘f*k*f’!”
Dít was die boodskap wat ’n kontrakteur van Big Concerts per ongeluk op die Wêrelddag vir Gestremdes aan ’n organisasie vir gestremdes gestuur het.
Graham Cunningham, ’n onafhanklike kontrakteur van Big Concerts, het in ’n interne e-pos sy misnoeë met Ari Seirlis, nasionale direkteur van die QuadPara-vereniging van Suid-Afrika (Qasa) uitgespreek – en toe die e-pos per ongeluk ook aan Seirlis gestuur.
Dít kom nadat Seirlis en Big Concerts ’n weke lange debat gehad het oor sitplekbeskikbaarheid vir gestremdes by U2 se Johannesburgse konsert.
“Hoeveel politiek en ‘bullsh*t’ kan daar rondom een vertoning wees!!!
“Hulle moet net ‘f*k*f’!” het Cunningham, in Engels, geskryf.
Seirlis het sedert begin November met Big Concerts probeer onderhandel vir goedkoper sitplekke vir gestremdes by die FNB-stadion.
Volgens hom was die goedkoopste sitplek vir gestremdes van R856, met geen gratis kaartjies wat aan gestremdes se helpers verskaf word nie.
Die goedkoopste kaartjies vir mense sonder ’n gestremdheid beloop R161.
Dít terwyl die FNB-stadion tydens WB 2010 goedkoop kaartjies én ’n ekstra kaartjie vir ’n handlanger aan gestremdes beskikbaar gestel het.
Big Concerts het intussen aangekondig hulle gaan ’n tydelike platform vir gestremde mense op die veld van die stadion oprig.
Gestremdes gaan ook ’n gratis tweede konsertkaartjie kry sodat helpers hulle in en uit die stadion kan vergesel.
“Gestremde aanhangers wat reeds kaartjies het, kan enige tyd van 09:00 op 21 Desember hul gratis kaartjie vir hul metgesel by enige Computicket-kantoor opeis.
“Aanhangers wat reeds kaartjies het, maar wat dit vir ’n goedkoper opsie wil verruil, is welkom om dit ook van dié datum af te doen.”
Luidens die verklaring distansieer Big Concerts hul van Cunningham se opmerking.
In ’n e-pos aan Seirlis het Cunningham gesê hy is jammer dat sy opmerking hul ore bereik het.
“Moet dit asseblief nie persoonlik opneem nie. Ek’s net gefrustreerd met al die ‘politiek’ wat die U2-toer omring. Dis asof ’n aantal organisasies dit as ’n platform vir hul saak wil gebruik, wat dit moeilik maak om op die enorme taak wat voor ons lê, te fokus,” het hy geskryf.
Seirlis het gister gesê hy is “verheug” oor Big Concerts se besluit om die gestremdes te akkommodeer, maar is ontevrede met Cunningham se reaksie.
Hulle is besig om regshulp in te win, het hy gesê.
- Daar is nog net 350 kaartjies oor vir U2 se Johannesburg-konsert nadat organiseerders eergister nóg 1 000 kaartjies beskikbaar gestel het. Kaartjies vir die konsert op 13 Februarie volgende jaar was binne ’n paar dae uitverkoop, maar ’n beperkte getal sitplekke gaan in die FNB-stadion ingerig word.