U2-kykers byna hoog en droog by groot konsert
2011-02-17 09:18
Theuns van der Westhuizen
Kaapstad - Vrydagaand se U2-konsert in die Kaapstad-stadion was byna ’n “droë konsert”.
Die stadion se dranklisensie het nie aan die wetlike vereistes vir die verbruik van alkohol by die konsert voldoen nie.
Stappe moes dus verlede week inderhaas gedoen word om die aanbieder van die konsert te help om die korrekte lisensie te kry.
Lesley de Reuck, direkteur van die stadion, het Woensdag gesê: “Dit was een van die goëlballe wat ons op die nippertjie moes hanteer om alles vir die konsert gereed te kry.
“Ons het gehelp om die proses te versnel en Big Concerts het nou ’n lisensie wat sal sorg dat niemand die konsert met ’n droë keel hoef by te woon nie.
“Die ander onverwagte kwessies wat spesiale aandag moes geniet, was van ’n tegniese aard en is ook gou opgelos.
“Alles is in plek vir die konsert. Ons vra net dat die konsertgangers betyds na die stadion kom om onnodige frustrasie te voorkom.”
Die 72180 mense wat kaartjies vir die konsert het, is 8080 meer as die getal toeskouers wat verlede jaar die grootste sokkerwedstryd nóg in die stadion bygewoon het.
Altesaam 64100 het die Wêreldbeker-halfeindstryd tussen Nederland en Uruguay bygewoon, het Louw Visagie van die stadion-bestuurspan gesê.
“Alles word gedoen om dit vir die U2-aanhangers so maklik as moontlik te maak om in die stadion te kom.
“Ons het byvoorbeeld 101 deursoekplekke by die toegangspunte tot die stadion ingerig om te sorg dat die vloei van mense nie vertraag of onderbreek word nie,” het hy gesê.
Mense wat kaartjies gekoop het, moet seker maak hulle het die regte kaartjies, berig Annelie Maré.
Volgens Emile Davids van Computicket lyk die koopbewyskaartjie wat aanvanklik uitgereik is, baie soos die toegangskaartjie self.
’n Koopbewys sal egter nie jou toegang verseker nie.
“Ons het vandeesweek SMS’e uitgestuur aan diegene wat nog nie hul regte kaartjies by Computicket afgehaal het nie,” het Davids gesê.
Regte kaartjies het ’n strepieskode wat by die ingang geskandeer sal word, wat die koopbewyse nié het nie.
- Die Burger