Tyd raak min vir Kapenaars in Idols
2010-08-30 09:00
Kaapstad – Met net twee Kaapse deelnemers in die top-12 van Idols is daar nog net tot Maandagaand om 22:00 tyd om te stem om hulle albei in die gewilde M-Net-realiteitsreeks te hou.
Elvis Blue (30) van George en Adeline Mocke (22) van Kaapstad is albei in die groep wat Sondagaand opgetree het en albei loop nou die gevaar om môre-aand uit te val indien hulle nie genoeg stemme kry nie.
Twee Idols-deelnemers word in môre se regstreekse uitslag-episode om 19:00 huis toe gestuur. Dié keer is die enigste twee oorblywende Kaapse deelnemers in die kompetisie boonop in dieselfde groep.
Kykers het net tyd tot vanaand om 22:00 om vir hul gunsteling in hierdie tweede groep van sewe deelnemers te stem nadat die eerste groep verlede Sondag opgetree het.
Saam met Blue – wie se regte naam Jan Hoogendyk is – en Mocke, is daar twee deelnemers van Durban – Lloyd Cele (28) en Zintle Mkwela (24). Daar is ook twee deelnemers van Johannesburg: Funeka Peppeta (24) en Jamie-Lee Sexton (22). Die sewende deelnemer is Gail Nkoane (25) van Kimberley.
Kykers het gisteraand gesien hoe Mocke “When love takes over” van David Guetta en Kelly Rowland gesing het. “Dis ’n redelik nuwe liedjie en meer van ’n ‘skare’-treffer, so hopelik hou mense net so baie daarvan soos ek,” het Mocke gesê.
Blue het “Heaven” van Bryan Adams gesing. “Ek is nou al ’n paar weke lank weg van my vrou en my dogter, Lila,” het Blue oor sy liedjiekeuse gesê.
“Vir my gaan dit daaroor dat ek hulle mis en dat ek graag by hulle wil wees.”
Volg Nuus24 op Twitter.