Two and a Half Men is 'gemors' – akteur
2012-11-27 15:22
New York – Die tienerakteur wat in die sitkom Two and a Half Men te sien is, het kykers in 'n video aangemoedig om nie dié program te kyk nie.
Die video is deur 'n Christelike kerk op YouTube gepubliseer.
Die 19-jarige Angus T. Jones, wat sedert 10-jarige ouderdom op die program is, het gesê hy wil nie daarop verskyn nie.
"Hou op om dit te kyk. Hou asseblief op om jou kop vol gemors te maak."
Warner Bros., vervaardiger van die program, wou nie kommentaar lewer nie. CBS, die kanaal waarop die program uitgesaai word, het nie onmiddellik reageer op 'n versoek om kommentaar nie.
Die tienerakteur het in die video, wat deur die Forerunner Christian Church in Kalifornië aanlyn geplaas is, gesê die program is "gemors" en het mense aangemoedig om dit nie te kyk nie.
Jones beskryf die kerk as sy "geestelike tuiste".
Jones vertolk die rol van Jake, die seun van die geskeide chiropraktisyn Alan.
Hy het gesê die soort vermaak waarin hy betrokke is, tas die brein aan en dat 'n "mens nie kan rondspeel wanneer dit by die ewigheid kom nie".
"Jy kan nie 'n Godsvresende mens wees en op 'n TV-program soos daardie verskyn nie. Ek weet ek kan nie. Ek is nie reg met wat ek leer, wat die Bybel sê en om op daardie TV-program te verskyn nie."
– Volg Nuus24 op Twitter
- Sapa - AP
