Twilight die gewildste
2009-08-10 10:58
Kalifornië - Die Twilight film was by verre die gewildste rolprent onder tieners by vanjaar se Teen Choice Awards in Hollywood.
Die gewilde vampier-film het Sondag met 11 toekennings tydens die seremonie weggestap. Dit sluit in vir die beste drama, liefdesverhaal, beste soen en gevegstonele, asook die beste liedjie.
Kristen Stewart het in die kategorie vir beste rol deur 'n vrou in 'n drama gewen, terwyl Robert Pattinson met twee branderplank-gevormde toekennings weggestap het, naamlik vir die beste akteur in 'n drama, asook die toekenning vir die aantreklikste akteur onder die manne.
"Ons sien julle 20 November in die teaters," het die mede-akteur Taylor Lautner aan ‘n gillende gehoor verklap.
Lautner en Ashley Greene, wat saam met Stewart en Pattinson in die opvolg-fliek, "New Moon" verskyn, is met die toekkennings vir die beste nuweling tot die silwerdoek vereer, terwyl Cam Gigandet gekroon is as die beste booswig.
Twilight se regisseur, Catherine Hardwicke, het saam met haar span op die verhoog verskyn.
Die toekennings is deur 83 miljoen stemme aanlyn verkies.
Talle wenners soos die 16-jarige Miley Cyrus en die Jonas Brothers is met meer as een toekenning vereer tydens hierdie, die 11de jaarlikse seremonie by die Gibson-teater by die Universal Studios, Hollywood.
- AP