Tweede seisoen kom dalk vir MasterChef SA

2012-08-24 15:37

Kaapstad – Bronne in die binnekring beweer dat ‘n tweede seisoen vir MasterChef Suid-Afrika sterk deur M-Net oorweeg word.

“Dit gaan definitief voort,” het ‘n bron bekend met die saak aan Channel24 gesê.

MasterChef SA het ten spyte van die prys-omstredenheid aan die einde, goeie kykertalle gelok, veral aan die einde van die reeks. Dit het die idee van ‘n tweede seisoen vir die werklikheidsreeks moontlik gemaak.

Party MasterChef SA-episodes se kykertalle het selfs dié van Carte Blanche en Idols oortref.

Volgens bronne sal ‘n amptelike aankondiging een van die dae gemaak word. Amateur-kosmakers sal dan weer kan inskryf.

Planne vir ‘n MasterChef SA met beroemdes, waaroor daar in Mei gespekuleer is, is glo geskrap.

M-Net wou nie onmiddelike kommentaar lewer nie.
 
– Volg Nuus24 op Twitter

- Channel24