Tropika Island lok baie kykers ná skietdood

2013-02-17 14:57

Reeva Steenkamp op die stel van Tropika Island of Treasure, wat die naweek vir die eerste keer uitgesaai is. (AP/Stimulii)

Johannesburg – Die werklikheidsreeks Tropika Island of Treasure het duisende bykomende kykers getrek toe Reeva Steenkamp in die eerste episode haar verskyning gemaak het, het die SABC berig.

Steenkamp (29) is vroeër die week in Oscar Pistorius se huis doodgeskiet.

Die staat het die atleet van moord met voorbedagte rade aangekla nadat die model vier keer geskiet is.

Voordat die program uitgesaai is, het die slagoffer nog gesê sy hoop dat haar deelname haar 'n tree nader sal bring aan 'n loopbaan as aktrise en televisie-aanbieder.

Die openbare uitsaaier het vroeër gesê die model se ouers het toestemming gegee dat die reeks uitgesaai mag word.

Kaizer Kganyago, ‘n woordvoerder van die uitsaaier, sê daar sal voor elke uitsending 'n huldeblyk aan haar wees.

Pistorius bring die naweek in polisiesel deur. Hy sal volgende week weer in die hof verskyn, waar hy aansoek om borgtog sal doen.

Die staat het reeds gesê die borgtog sal teengestaan word.

Volg Nuus24 op Twitter