Toy Story 3 het loket aan die gons
2010-06-21 03:21
Los Angeles - Ná sowat ‘n dekade is die karakters van Toy Story terug op die silwerdoek en het dié animasiefilm ‘n nuwe openingsrekord vir ‘n rolprent wat deur Disney vervaardig is, opgestel.
Toy Story 3 het $153 miljoen (sowat R1.1 miljard) tydens sy openingsnaweek by die loket ingesamel. Filmliefhebbers in die VSA en Kanada het sowat $109 miljoen (R813 miljoen) hiervan vir die rolprent ingesamel.
Die rolprent The Incredibles het in Mei 2004 die vorige rekord vir die VSA en Kanada op $70.5 miljoen (R522 miljoen) opgestel.
Die enigste ander twee animasierolprente wat tydens ‘n openingsnaweek in totaal meer s $100 miljoen ingesamel het, was Shrek the Third met $122 miljoen (sowat R911 miljoen) in 2007 en Shrek 2 met $108 miljoen (R806 miljoen) in 2004.
- Reuters