TopTV-intekenare sukkel met diens
2010-05-17 06:39
Thinus Ferreira, Die Burger
Kaapstad - 'n Beleërde TopTV se kliëntediensoproepsentrum knak onder duisende oproepe wat die betaal-TV-operateur eenvoudig nie kan hanteer nie, ’n gehawende elektroniese programgids (EPG) op televisie wat nie reg werk nie en nuwe intekenare wat sedert 1 Mei, toe die diens begin het, steeds nie gehelp is nie.
Die Burger is oorval met klagtes van radelose nuwe intekenare wat vrugteloos probeer deurkom na TopTV se kliëntediensnommer by 08600 86788. Die nommer moet gebel word om die diens te aktiveer en ’n gratis installeerder te ontbied, nadat ’n dekodeerder gekoop is.
TopTV het die kliëntedienssentrum reeds twee keer die afgelope twee weke vergroot en brei dit vandag met nog 100 oproepsentrum-operateurs uit nadat duisende oproepe eenvoudig nie deurgaan nie of afgesny word.
TopTV het ook pas ’n nuwe SMS-hulpnommer – 40004 – ingestel waarheen intekenare wat ná veelvuldige pogings net nie deurkom nie, hul naam en TopTV-dekodeerdernommer kan SMS. TopTV belowe intekenare sal binne 24 uur gekontak word.
Viola Samuels van Mitchells Plain is een van die moedelose nuwe TopTV-intekenare wat met groot opgewondenheid op 1 Mei – die eerste dag waarop TopTV-dekodeerders te koop aangebied is – hare by House & Home gaan koop het.
Teen Vrydag het sy steeds gewag dat iemand van On Digital Media (ODM), wat die TopTV-betaaltelevisiediens bedryf, na haar toe terugkom nadat sy uit pure radeloosheid opgehou het om stemposboodskappe te los.
“Ek het my TopTV-dekodeerder met gratis installering op 1 Mei gekoop. Sedert daardie dag wag ek tevergeefs nadat ek hope boodskappe gelos en e-pos gestuur het – sonder enige reaksie.’’
Intekenare wie se TV-diens wel geaktiveer is, kla ook oor die gebrekkige EPG. Byna alle TopTV-kanale se programroosters is heeltemal verkeerd en stem nie ooreen met die uitsaaityd nie. Ander kanale se EPG het geen inligting nie en ander TV-kanale se EPG het verkeerde inligting. TopTV-kykers het dus geen idee wat wys, of gaan wys wanneer hulle die EPG oproep nie, en die verskaffer het ook nie ’n TV-gidstydskrif soos DStv nie.
“Ons is bewus van die EPG-probleme en dis ’n hoë prioriteit vir ons,’’ het Elouise Kelly, ODM-bemarkingshoof, gister gesê.
“Ons het ’n span wat voltyds saam met ’n span van oorsee daaraan werk, van waar die EPG gestuur word. Die inligting wat in die EPG gelaai word, word basies nie deur die sagteware gelees nie. Die span is vol vertroue dat die probleem vroeg hierdie week opgelos sal word,’’ het sy gesê.
Melinda Connor, TopTV-woordvoerder, het gesê TopTV se telefoonstelsel word verder gemoderniseer om nou 270 oproepe gelyktydig te kan hanteer, met nog 100 bykomende mense wat van vandag telefone sal antwoord.
“Dit sal help om die massiewe oproepvolume af te bring. Mense kan ook ’n SMS stuur na 40004.’’
- Die Burger