TopTV het ons mislei oor porno, kla AGS
2011-12-09 07:01
Pretoria – Die Apostoliese Geloofsending (AGS) het ’n striemende aanval gedoen op TopTV se “misleiding en gebrek aan integriteit” weens dié se plan om pornografie uit te saai.
Dr. Isak Burger, president van die AGS, dreig met ’n landwye boikotveldtog saam met ander kerke teen TopTV en sy adverteerders as dié plan voortgaan.
Burger sê in ’n verklaring mnr. Vino Govender, uitvoerende hoof van On Digital Media wat TopTV bedryf, het verlede jaar met TopTV se bekendstelling gesê hulle bedryf hul onderneming volgens streng Christelike etiese kodes.
Hy het beloof dat hulle nie van plan is om pornografie uit te saai nie en gesê hulle “wil nie die denke van miljoene Suid-Afrikaanse kinders vergiftig nie”.
Al wat ’n mens nou kan aflei, is dat die vergiftiging van miljoene kinders se denke nou aanvaarbare sakepraktyk vir TopTV geword het, lui die verklaring.
Burger sê dit is bewys dat pornografie in enige medium vernietigend is vir ’n gemeenskap. Mans en tieners word só verslaaf daaraan dat dit al as “die nuwe crack” bestempel is.
Mans wat kompulsief na pornografie kyk, sukkel om normale seksuele verhoudings met hul vroue te hê. Dit lei tot huweliksprobleme en egskeiding. Gesinsverbrokkeling is ’n groot bydraende faktor tot misdaad, geweld en ander maatskaplike probleme in Suid-Afrika.
Burger het ’n beroep op die Onafhanklike Uitsaai-owerheid gedoen om TopTV se aansoek te verwerp.
Tatho Mahapa van TopTV hou vol dat die beskerming van kinders vir hulle van die grootste belang is.
TopTV is bewus van godsdienstige besware teen volwasse inhoud, maar is ook bewus van versoeke daarvoor.
Ná deeglike oorweging van navorsingsverslae het hulle besluit om dit as ’n afsonderlike, losstaande opsie beskikbaar te stel.
Mense wat dit nie wil hê nie, sal daarom nie toegang daartoe hê nie.
Volgens TopTV is dit nie ’n oplossing om eenvoudig nié die volwasse inhoud te lewer nie, omdat die vraag daarna nie sal weggaan nie.
– Volg Nuus24 op Twitter
- Beeld