TopTV-baas kry trekpas oor porno-planne
2012-02-01 10:11
Kaapstad – Vino Govender, TopTV se uitvoerende hoof, het die trekpas gekry te midde van toenemende ongelukkigheid oor die inhoud op die betaalkanaal.
Druk laai op teen On Digital Media (ODM), wat TopTV bedryf, nadat hul poging om drie porno-kanale bekend te stel, misluk het.
Beleggers is bekommerd oor die rigting wat die maatskappy inslaan, sowel as die inhoud op die kanaal.
Volgens bronne is Woensdag Govender se laaste dag op kantoor. Hy sal deur Eddie Mbalo, voorsitter van ODM, vervang word, maar dit is nie bekend hoe lank hy (Mbalo) in dié posisie sal wees nie.
Mbalo is die voormalige uitvoerende hoof van die Nasionale Rolprent-en-videostigting.
Govender het in 2007, ná Mergan Moodley, die stigter, se skielike siekte, as uitvoerende hoof van ODM oorgeneem.
TopTV het nie onmiddellik op medianavrae oor Govender se afdanking reageer nie en ODM het tot dusver geen openbare aankondiging of verklaring uitgereik oor Govender se toekoms nie.
– Channel24
– Volg Nuus24 op Twitter