TopTV: Pornografie is onskadelik
2012-01-17 13:01
Kaapstad – On Digital Media (ODM), wat TopTV besit, het in 'n verklaring gesê pornografie "is onskadelik" en "TopTV vra nie om verskoning vir die feit dat hy aan diegene wat volwasse inhoud op televisie wil kyk, toegang daartoe wil gee nie".
Dít kom nadat die Johannesburgse hooggeregshof ODM en TopTV Maandag verbied het om 'n pornografiese pakket bekend te stel.
Tydens TopTV se bekendstelling in Mei 2010 het Vino Govender, uitvoerende hoof, gesê TopTV sal as deel van sy sakeplan nie pornografiese kanale uitsaai nie.
"Ons bestuur ons besigheid met sterk Christelike etiese kodes en ons beplan nie om 'n pornografiese kanaal bekend te stel nie. Ons wil nie miljoene Suid-Afrikaanse kinders se breine vergiftig nie."
In September 2011 het die maatskappy egter 'n ooreenkoms met Playboy TV UK/Benelux aangegaan om drie kanale, Adult XXX, Private Spice en Playboy Europe, uit te saai.
TopTV het Maandag 'n verklaring uitgereik en gesê pornografie is onskadelik.
"Pornografie is nie net onskadelik nie, maar dit verminder ook die aantal seksmisdrywe in gemeenskappe en in lande waar mense gratis toegang daartoe kry."
Marius Liebenberg, senior adjunkhoof van verkope en bemarking, het gesê die betaaloperateur neem in ag dat diegene wat teen die nuwe kanale gekant is, in die minderheid is.
TopTV wou die pornografiese pakket aanvanklik op 20 Desember bekendstel. Die datum is later na 20 Januarie verskuif, maar die Onafhanklike Kommunikasie-owerheid van Suid-Afrika (Okosa) het 'n dringende aansoek voor die hooggeregshof gebring en gevra dat die aangeleentheid tot 31 Januarie uitgestel moet word.
– Channel24.
– Volg Nuus24 op Twitter.