Tom rooi in die gesig oor restaurant-rekening
2012-08-24 11:30
Londen – 'n Besoek aan 'n restaurant in Engeland het vir die akteur Tom Cruise in 'n groot verleentheid ontaard toe hy nie die rekening van £220 (sowat R 2 905) kon betaal nie.
Die 50-jarige akteur het Dinsdag die Vheer Dhara-restaurant in St Albans, Oos-Engeland, saam met van sy vriende en sy 19-jarige dogter, Isabella, besoek. Die restaurant wou egter nie sy American Express-kaart of sy dollar-note aanvaar nie.
Darshit Hora, die restaurantbestuurder, het aan die Evening Standard gesê dit "was ’n groot skok toe hy instap. Cruise het gesê iemand het voorgestel dat hy na ons moet kom, maar hy wou nie sê wie nie”.
“Toe hulle klaar geëet het, wou hy betaal, maar ons kan nie American Express aanvaar nie. Hy het toe gesê dat sy hele groep net dollars het; ‘n vrou het toe vorentoe gekom en in £50-note betaal.”
Darshit het bygevoeg dat die groep se rekening “£220,85 (sowat R2 900) was. Hulle het ‘n fooitjie van £80 (sowat R1 000) gelos.
"As hulle nie die geld gehad het nie, sou die restauranteienaars in elk geval die ete vir hulle gratis gemaak het,” het sy gesê.
Die Mission Impossible-ster se lyfwagte het eerste by die Indiese restaurant opgedaag en die personeel gewaarsku dat “n “spesiale” Hollywood-ster ‘n “stil” ete wil geniet.
“Hulle het gesê iemand spesiaal kom hier eet, maar het nie gesê wie nie. Toe hy inkom was ons almal geskok, maar ons wou net professioneel optree,” het die restauranteienaar bygevoeg.
“Hy het gesê dat hy ‘n lekker, stil ete saam sy familie wil hê. Ons het hulle naby die kombuis laat sit.”
Die ster het die personeel gewaarsku dat hy “regtig honger” is en het gevra dat sy voorgereg dieselfde tyd as sy hoofgereg bedien word.
Cruise, wie se egskeiding van Katie Holmes Woensdag gefinaliseer is, is in Engeland vir die verfilming van sy nuwe fliek, All You Need Is Kill, waarin die aktrise Emily Blunt ook te sien is.
– Volg Nuus24 op Twitter
- BangShowBiz
