Tom Cruise 'verlaat Kerk van Sciëntologie'
2012-09-27 12:47
Los Angeles – Die skindertydskrif Star Magazine het berig dat die akteur Tom Cruise dalk die Kerk van Sciëntologie kan verlaat.
Die tydskrif, wat Vrydag in die buiteland beskikbaar sal wees, maak nuwe inligting oor Cruise bekend wat tot bespiegelings gelei het dat die filmster, wat onlangs van sy derde vrou, Katie Holmes, geskei het, 'n geloofskrisis beleef.
"Tom het nie erken hy gaan Sciëntologie vir altyd verlaat nie," het iemand in die binnekring oor die nuwe verwikkelings gesê.
"Maar hy het hom van die kerk gedistansieer en bring tyd saam met vriende deur wat nie deel is van die geloof nie."
Cruise (50) heroorweeg glo sy bande met dié omstrede kerk nadat sy geloof onder skoot gekom het en sy beeld in die openbaar 'n groot knou toegedien is tydens sy onlangse egskeiding. Cruise dink ook aan die impak wat dit op Suri, sy sesjarige dogter met Holmes, gaan hê.
"Tom soek hulp by vriende wat ander perspektiewe het en hy kry raad oor hoe om aan te beweeg ná Katie asook oor alles wat hy met Sciëntologie deurgegaan het," het die bron gesê.
"Hy het finaal gesien sy werk as 'n ambassadeur vir Sciëntologie het hom nie so goed gedoen soos wat hy gehoop het nie; hy het deur drie egskeidings gegaan en sy persepsie in die publiek se oë is baie swak."
Sciëntologie is ook geblameer vir die verbrokkeling van sy tweede huwelik met Nicole Kidman, asook met sy eksmesie, Penélope Cruz. Cruise se eerste vrou, Mimi Rogers, het hom aan Sciëntologie bekendgestel.
– Radar Online.
– Volg Nuus24 op Twitter.
