Thys se MasterChef-bootjie sink in Zanzibar
2012-06-13 08:50
Kaapstad – Die nagereg-maestro Thys Hattingh van Rustenburg se MasterChef-bootjie het Dinsdagaand op spesery-eiland Zanzibar gesink.
"Dit was definitief die beste ding wat met my en my familie gebeur het. Ek sal dit 'n miljoen keer weer oor doen. Ek is so bly dat ek die geleentheid gehad het om deel te wees daarvan," het hy ná die episode gesê.
Die top-agt-deelnemers het verlede week hul tasse gepak vir dié idilliese eiland. Vir die uitdaging, waar hulle in groepe moes werk, het elke groep 50 porsies kos, wat die Zanzibar-kultuur weerspieël, voorberei.
Die rooispan, wat bestaan uit Khaya Silingile, Ilse Fourie, Manisha Naidu en Lungile Nhlanhla het die uitdaging loshande gewen. Khaya het ook gesorg vir 'n groot verrassing toe sy haar swangerskap aankondig het.
In die eerste gedeelte van die druktoets moes die blouspan, Deena Naidoo, Thys, Sue-Ann Allen en Sarel, vars speserye identifiseer, maar Deena en Thys het vasgeval in dié toets.
Die tweetjies het mekaar vir die soveelste keer die stryd in die kombuis aangesê en moes sjef Jussi Husa van die Essque Zalu-hotel se gerookte swaardvismaag voorberei.
Thys se vis was té gaar en terwyl Deena se vis ook nie perfek voorberei is nie, het hy beter tegniek getoon. Die beoordelaars het besluit dat Thys die een is wie sy MasterChef-voorskoot moet ophang.
MasterChef SA word Dinsdae om 19:30 op MNet uitgesaai.
– Volg Nuus24 op Twitter
- Nuus24
