The Eagles land volgende jaar in SA
2011-12-19 07:19
Anna-Retha Bouwer en Elretha Britz
N die 40 jaar lange bestaan van die groep The Eagles was hulle nog nooit in Suid-Afrika nie, maar dít verander volgende jaar wanneer hulle vir drie konserte in die land gaan wees.
Die groep – wat bestaan uit Glenn Frey, Don Henley, Joe Walsh en Timothy B. Schmit – sal in ’n twee uur lange konsert klassieke treffers soos die immergroen Hotel California, Desperado, Take It Easy, One of These Nights, Heartache Tonight en Take It to the Limit uitvoer.
Hulle is op 4 April in die Kaapstadstadion, op 7 April in die Superbowl by Sun City en op 8 April in die ENB-stadion in Johannesburg.
Benewens die groot treffers van die groep sal die gehoor van die lede se solotreffers hoor, soos Boys of Summer, Life in the Fast Lane en Dirty Laundry.
The Eagles het al meer as 120 miljoen albums wêreldwyd verkoop en ses Grammys ingepalm.
Met verkope van meer as 29 miljoen kopieë is hul Greatest Hits 1971-1975 saam met Michael Jackson se Thriller die albums wat nog die beste ter wêreld verkoop het.
Dié aankondiging kom nadat die Moody Blues bekend gemaak het hulle kom in Mei Suid-Afrika toe, soos ook die gewilde Kanadese sanger Michael Bublé.
Diegene wat in ligter Kersliedere belang stel as dié in die berig hierbo, kan Bublé se Christmas-album in gedagte hou. Meer as 4miljoen kopieë van die album is reeds wêreldwyd verkoop.
Bublé is op 1 en 2 Mei in Kaapstad en 5 en 6 Mei in die Superbowl by Sun City.
Die Moody Blues, asook 10cc en Procol Harum, is op 30 Mei in Kaapstad en 1 Junie in Johannesburg.
Kaartjies vir die Eagles se stadionvertonings kos tussen R320 en R1 070, maar diegene wat hulle in die Superbowl wil sien, sal aansienlik meer moet hoes. Daardie kaartjies kos tussen R1 520 en R3 520.
Volg Nuus24 op Twitter
- Volksblad