Tekenprent wys 'vampier'-Armstrong in onderhoud

2013-01-16 18:07

Tapei – 'n Taiwannese nuusgroep het Woensdag 'n tong-in-die-kies-tekenprent vrygestel oor die Lance Armstrong-skandaal, waarin die fietsryer tydens sy "onderhoud" met Oprah Winfrey in 'n vampier verander.

In Next Media se tekenprent van twee minute lank word die onderhoud by Armstrong se huis in Texas gehou. Hy is geklee in 'n Tour de France-hemp en verander dan in 'n vampier.

Die tekenprent wys leë plekke op die muur waar Armstrong se trofeë gehang het.

"Het enigiemand al probeer om dinge uit die oogpunt van onteerde atlete soos Armstrong te sien?" vra die verteller.

"Hulle het seker almal baie goeie verskonings, soos dat hulle steroïdes en ander opkikkers nodig het om geld te maak om siek kinders te red," sê sy terwyl die vampier-Armstrong 'n geskokte Winfrey na sy geheime laboratorium neem.

Volgens berigte het Armstrong glo "gebieg" in sy onderhoud met Winfrey oor sy gebruik van verbode middels. Dié onderhoud word Vrydag uitgesaai.

Dit is Armstrong se eerste onderhoud sedert hy van sy sewe Tour de France-titels gestroop is. Armstrong het vir 'n dekade lank heftig ontken dat hy verbode middels gebruik het.

Kyk hier na die video:



       
– Volg Nuus24 op Twitter

- Sapa - AFP