Taptoe kort daardie sprankel
2011-09-03 09:18
’n Kollega vertel van sy drilsersant in die weermag wat altyd gesê het ’n mens moet daardie “Nugget-gevoel” kry wanneer ’n militêre orkes speel.
Wat die herkoms van die begrip “Nugget-gevoel” is, sal ek nie weet nie, maar ek kan raai dit het te make met ’n gevoel van verrukking, van iets groter as jyself en, natuurlik, hoendervel.
Ongelukkig ontbreek dié gevoel grootliks by vanjaar se SA Taptoe.
Moet geen fout maak nie, die vertoning bly die moeite werd, want dit is nie meer aldag dat ’n mens orkeste soos die polisie s’n of ’n Skotse regiment in aksie sien nie.
Die taptoe is vermaak vir die hele gesin omdat dit iets anders as die gewone bied.
’n Mens voel met tye selfs patrioties, veral aan die einde van die vertoning met die onthulling van die grootste landsvlag wat nog gemaak is.
Wat egter ontbreek, is daardie grootse klank waarvan jy ’n suggestie kry tydens die massa-optrede aan die einde, wanneer die doedelsakke se droefgeestige skreeugeluid met die speel van Amazing Grace jou armhare laat regop spring.
’n Mens mis ook daardie militêre presisie, soos die polisie-orkes wat tydens hul vertoning bevoorbeeld loslittige sangers inspan.
Haggis and Bong is ’n interessante Keltiese en metal-fusiegroep wat ’n ongewone begeleiding vir die Hoogland-dansers bied.
Met hul kaal bolywe geverf met blou Braveheart-lyfverf en hul lang boskasies was hulle nogal iets om te aanskou!
Dit was ook indrukwekkend om te kyk hoe die Hoogland-meisies vlugvoetig oor en tussen die swaarde wip.
Via Volcano, ’n pantsulagroep, het ook hul applous verdien vir hul ritmiese spronge.
Die Lochiel-marsjeergroep van Nieu-Seeland was die moeite werd om van bo af dop te hou, want ’n mens verwag kort-kort dat hulle in mekaar gaan vasloop as gevolg van die manier waarop hulle vorentoe en agtertoe oor die terrein kriskras.
’n Mens wonder wel hoeveel gehoorlede saam met hulle gaan terugkeer Nieu-Seeland toe ná die polisie se voorstelling van ’n motorkaping en die “skiet” van AK-47’s!
Maar wanneer dit kom by suiwer orkesspel, draai die meeste klanke net duskant “Nugget” om.
– Volg Nuus24 op Twitter.
- Beeld