TV-reeks belig SA kunste
2010-04-26 15:35
Bloemfontein – Meer as 80 000 kilometer is afgelê om die uitsonderlike nuwe televisiereeks, A Country Imagined, na die kassie te bring.
Dié reeks wat Sondagaande om 21:00 op SABC2 uitgesaai word, poog om nie net die natuurskoon van Suid-Afrika te besing nie, maar gaan ook die land se ryk en uiteenlopende kunsgemeenskap huldig.
Dit word aangebied deur die bekroonde sanger en eertydse antropoloog Johnny Clegg, wat vanjaar sy dertigste jaar in die musiekbedryf vier.
“Ek dink die program gaan Suid-Afrika se landskappe en kuns op ’n nuwe manier voorstel en ’n bewustheid skep vir die dieper verhouding tussen dié landskappe en kunstenaars,” het Harriet Gavshon, die uitvoerende vervaardiger van die reeks gesê.
Haar maatskappy, Curious Pictures, is ook bekend om reekse soos Tobias’ Bodies, The Lab en Hopeville.
Gavshon vertel dat elke episode soos ’n essay verpak is. Daar is onder meer met internasionaal gerekende kunstenaars soos David Goldblatt, William Kentridge, Strijdom van der Merwe en Willem Boshoff gesels, asook met skrywers soos Nadine Gordimer.
Verder is daar ’n fokus op Olive Schreiner, en op musikante soos Hugh Masekela en Enoch Sontonga.
Die onderhoude toon die unieke invloed wat ’n bepaalde landskap op die kunstenaars se werk gehad het, soos byvoorbeeld die Oos-Kaap se inwerking op Sontonga en Schreiner. Die fotograaf Goldblatt gesels oor die myndorp Randfontein, wes van Johannesburg, en wys die invloed van mynboubedrywighede op dorpe soos dié in sy werk uit.
In ’n episode gesels Boshoff oor sy kunswerk Children of the Stars , wat tekenend geplaas is in die Wieg van die Mensdom naby Krugersdorp, oor hoe ver hy inspirasie gaan haal vir sy kuns.
Navorsing het reeds 18 maande gelede begin sodat die landskap en die omgewing se kuns eers behoorlik verken kon word. Bykans elke landstreek is besoek.
“Ek dink kykers gaan van voor af verlief raak op ons land. Die reeks is ’n viering van ons land en die skeppende talent daarin,” het Gavshon gesê.
Die vervaardigers is Lusanda Chauke en die kunshistorikus Tracy Murinik.
Daar is nie ’n onderskeid getref tussen formele of dan hoë kuns of vlytkuns nie. “Ons het alle kunsvorme op dieselfde manier hanteer, hetsy dit nou rotskuns, kralewerk of visuele kuns is.”
A Country Imagined is op alle Suid-Afrikaners gerig, meen Gavshon.
“Die reeks wys hoe elkeen deel vorm van die land. En hoe kuns spontaan uit die landskap groei.”
- Die Burger
- Die Burger