Switchfoot reg om Kaapstad te rock

2012-08-11 16:35

Malherbe Pelser

Kaapstad – Die Amerikaanse rockers Switchfoot het Woensdagaand vir die eerste keer in Johannesburg by die Big Top Arena in Carnival City opgetree.

Die hoofsanger Jon Foreman het gesê dat 'n besoek aan Johannesburg al lankal moes gebeur het, maar dat dit vir hom lyk of dit eers moes sneeu in Johannesburg voor hulle so kon maak.

Genadiglik vir almal het die sneeu Dinsdag sommer behoorlik op die Goudstad neergedaal.

Die groep het 'n goeie mengsel van bekende treffers en nuwe musiek gespeel en vir die 100 minute wat hulle op verhoog was het hulle die aandag en van die gehoor behoorlik vasgevang.


(Foto: Malherbe Pelser)

Switchfoot is een van min groepe deesdae wat kommersiële sukses met 'n positiewe boodskap kan kombineer – in die meeste gevalle is dit of een of die ander. Hul liedjies wissel tussen sagter, harder en baie hard en het dus iets vir almal in die gehoor se smaak gehad.

Ou gunstelinge soos Dare You to Move en Meant to Live het die hele Big Top Arena aan die saamsing gehad terwyl nuwe gunstelinge in Afterlife en Dark Horses gebore is.


(Foto: Malherbe Pelser)

Foreman het elke geleentheid wat hy gekry het gebruik om vanuit die gehoor te sing en sodoende almal te laat voel dat hy nie 'n ster wat verhewe bo die gehoor is nie – hy is ook net 'n ou wat mal is oor musiek en die mense rondom hom.

Gangs of Ballet het vroeër die aand die verhoog vir Switchfoot warm gespeel en dit is duidelik dat hierdie Durban-gebasseerde groep al diep in die harte van Suid Afrikaanse musiekliefhebbers geklim het.

Die enigste laagtepunt was toe die aand en die groep se vertoning verby was – indien dit weer sal moet sneeu vir Switchfoot om terug te keer Johannesburg toe sal almal wat in die Big Top Arena was hoop dat dit sommer gou weer gebeur.


(Foto: Malherbe Pelser)

Switchfoot tree Saterdag 11 Augustus by die Grand West Arena in Kaapstad op.

Daar is nog kaartjies by Computicket beskikbaar.

– Volg Nuus24 op Twitter.