Swanger Catherine steeds in die hospitaal

2012-12-04 11:24

Londen – Catherine, die hertogin van Cambridge, is steeds in die hospitaal met erge oggendnaarheid nadat sy haar swangerskap bevestig het, berig SkyNews.

Die hertogin is Maandag in die King Edward VII-hospitaal opgeneem, waar sy waarskynlik die volgende paar dae sal wees.

Haar man, prins William, het die hospitaal om 20:20 (plaaslike tyd) verlaat en het nie die media te woord gestaan nie.

Die res van die koninklike familie het ook Maandag van die swangerskap uitgevind.

Die koninklike familie en Catherine se gesin is "verheug" oor die nuus.

Die baba sal die derde aanspraakmaker op die troon wees, dus sal prins Harry nou in die vierde plek in dié lyn afskuif.

Ongeag of die kleinding ’n ­seun of meisie is, sal hy of sy die Britse troon kan bestyg nadat wetgewing oor opvolging ge­wysig is.

Die St. James-paleis wou nie sê hoe lank die paartjie al weet van die swangerskap nie, en het slegs gesê dat dit "onlangs" was.

– Volg Nuus24 op Twitter