Survivor: Hierdie bekendes op eiland gestrand
2010-01-09 05:36
Thinus Ferreira
Kaapstad. – ’n Ontkleedanseres, ’n vuurdanser, ’n paalspringer en spiertiere, blondines, modelle en musikante is onder die plaaslike bekendes in Survivor SA Santa Carolina, wat op 20 Januarie op M-Net begin.
Die derde Survivor SA is einde laas jaar op Paradys-eiland aan die Mosambiekse kus verfilm.
M-Net is so seker daarvan dat die betaalkanaal ’n TV-treffer op hande het dat advertensies op die program reeds R33 500 per advertensie kos.
Onder die 18 bekendes is Egoli-sterre soos Christina Storm en Izak Davel, wat in ’n klein swembroekie te sien gaan wees.
Survivor SA Santa Carolinais in hoëdefinisie (HD) verfilm en sal op M-Net se HD-kanaal (DStv 170) uitgesaai word.
Die Binnelanders-spelers Sandi Schultz (wat ’n vuurdanseres is) en Gys de Villiers gaan ook sake op die eiland uitspook, saam met M-Net se blonde kontinuïteitstem, Ashley Hayden.
Ander bekende blondines is Hanna Grobler, wat bekendheid verwerf het in kykNET se Getroud met Rugby, sowel as GiGi, die eksotiese ontkleedanseres van Poena is Koning.
Ander deelnemers sluit in die paalspringer Okkert Brits, die kragreus Garth Collins en die Pasella-aanbieder en voormalige Mej. SA Cindy Nell-Roberts.
Onder die musiekmakers is Jub Jub, die hip-hop-sanger ProVerb en die Pretoriase platejoggie Lady Lea. Dan is daar nog komediante soos Louw Venter van Rainbow Skellums, Kaseran Pillay en Darren Maule.
- Beeld