Suksesvolle teaterstukke op kykNET te sien
2010-11-17 07:45
Volksblad
Bloemfontein - ’n Skoot in die donker. So beskryf Albert Maritz die kans wat hy gewaag het om twee Afrikaanse woord- en musiekproduksies vir televisie aan te bied.
Maritz is die regisseur van Wyk en die meisies en Elders aan diens. Albei was groot gunstelinge op kunstefeeste. Nou kry ’n groter gehoor die kans om te sien waaroor die positiewe resensies gaan.
Die resensent Kobus Burger (destyds van Beeld) het Elders aan diensas “’n blink juweel” beskryf. Gerrit Brand (destyds van Die Burger) het in sy resensie gesê Wyk en die meisies“is smaakvol, deurleefd en passievol”.
Die opnames van albei produksies is voor ’n gehoor gedoen.
“Die omstandighede was nie perfek vir Wyk en die meisiesnie, maar met Elders aan dienskon ons tegnies meer moeite doen.
“Natuurlik het ’n mens meer beheer in ’n ateljee, maar ek hou van die onmiddellikheid en rouheid wat in ’n opname voor ’n gehoor verkry word.”
Hy droom daarvan om sy sukses-produksie Faan se trein ook te laat beeldsend. Nog ’n droom is om N.P. van Wyk Louw se Germanicus volledig op die planke te bring.
Elders aan diens bestaan uit verwerkings van Jeanne Goosen se gedigte. In die rolverdeling is Nicole Holm, Luna Paige en Van den Heever.
Hy het die twee produksies op die planke gebring om “die grootsheid van Afrikaans te vier en die digters opnuut onder die aandag van die publiek te bring”.
“Die stukke is nie kabaret in die ware sin van die woord nie, maar heilige koeie word tog opgegrawe en daar is ’n gees van oopheid in pas daarmee,” sê Maritz.
- Wyk en die Meisies word op 29 November om 21:30 op en Elders aan diens op 6 Desember om 21:30 op kykNET uitgesaai.
- Volksblad