Sukkelende sepie gly binnekort van M-Net na kykNET
2010-08-27 07:08
Kaapstad – M-Net is klaar met die sepie Binneland Sub Judice,wat einde Maart volgende jaar van die betaalkanaal sal verdwyn.
Binneland Sub Judice,wat weeksdae om 18:00 op M-Net enkykNET uitgesaai is, sal nou na kykNET skuif, wat besluit het om die sepie oor te neem en reeds die sepie Villa Rosa uitsaai.
In April sal dit die eerste keer in byna 20 jaar wees dat daar moontlik nie op weeksdae ’n plaaslike sepie op M-Net uitgesaai sal word nie nadat M-Net vroeër vanjaar ook Egoli weggedoen het. Die uitsaaier volg die Amerikaanse tendens waar sepies se gewildheid daal weens die groeiende gewildheid van realiteitsreekse.
M-Net sou die tydgleuf egter met ’n nuwe sepie kon vervang en die betaalkanaal is besig om die moontlikheid van ’n nuwe sepie te ondersoek.
Binnelanders het in Oktober 2005 op M-Net begin en het in April ’n naamsverandering na Binneland Sub Judice ondergaan toe die regswêreld by die hospitaaldrama gevoeg is. Die sepie is ook van ’n halfuur na ’n uur lange uitsending verleng. Die Sub Judice-uitbreiding met ’n vergrote nuwe rolverdeling en stelle wat teen groot koste geskep is, was egter nie suksesvol nie.
Volgens M-Net sal die program terugkeer na ’n halfuur lange tydgleuf met die regsaspek wat geskrap gaan word wanneer dit na kykNET oorgaan.
Die naam behoort ook na verwagting na net Binnelanders terug te verander.
“In die vinnig veranderende wêreld van televisie is dit belangrik om deurlopend navorsing te doen oor die behoeftes van kykers en om ons programaanbod dienooreenkomstig aan te pas,” het mnr. Theo Erasmus, direkteur vir M-Net se algemene vermaakkanale, oor die besluit gesê.
Ingeligtes op stel het gister aan Die Burger gesê hulle is Woensdag ingelig dat die program sal terugkeer na net ’n halfuur en ’n kykNET-produksie word.
“Almal is te besig om daaroor te dink om te weet wat hulle regtig daarvan dink. Dit maak nie ’n opskudding nie. Niemand is omgekrap nie.
“Daar sal nie werklik groot draaiboekveranderinge nodig wees nie,” het ’n bron gesê.
Volg Nuus24 op Twitter.
- Die Burger