‘Stuur groete vir Mannetjies Roux’ stem tot nadenke
2011-05-21 09:11
Kaapstad. – Die rondreisende Afrikaanse musiekspel Stuur groete aan Mannetjies Roux het eergisteraand in die Atterbury-teater in Pretoria geopen.
Die spelers het ’n staande toejuiging ontvang. Onder die gaste was die rugbylegende Mannetjies Roux self.
Die resensent Anna-Retha Bouwer van Die Burger se susterskoerant Beeld meen waar Mamma Mia!, wat as inspirasie vir die musiekspel gedien het, jou lig en opgeruimd laat, laat Mannetjies Roux jou met ’n swaarder gemoed en stem dit jou tot nadenke. “Daar is ironieë, geheime, humor en swaarmoedigheid. Dít, saam met ’n ou plaashek en windpomp op die verhoog, verplaas jou na die Karoo waar ’n boer steeds verwonderd staan oor dáái drie van Mannetjies Roux.”
Die verhaal speel af op ’n Karooplaas, Dwarsbult, aan die begin van die jare tagtig. Dit handel oor ’n dramatiese vakansie waar dinge onherroeplik op dié plaas verander het ná die aankoms van ’n vreemdeling.
Die musiekspel dien as voertuig vir Laurika Rauch se gewildste liedjies wat deur Rauch se man, Christopher Torr, by die verhaal ingewerk is. Torr is die skrywer van die musiekspel.
Ander spelers is benewens Rauch, Deon Lotz, Kika Smit en Isadora Verwey. Stuur groete aan Mannetjies Roux begin op 22 Junie in die Kunstekaap-teater.
Volg Nuus24 op Twitter.
- Die Burger