Stryd oor Chris Brown se gemeenskapsdiens duur voort

2013-02-07 11:56

Los Angeles – 'n Regsverteenwoordiger van die sanger Chris Brown het bewerings dat hy nié werklik sy gemeenskapsdiens voltooi het nie, verwerp, en boonop dokumente ingedien wat sy standpunt bewys.

Mark Geragos, Brown se prokureur, het dokumente by die hof ingedien waarin hy beweer aanklaers het inligting weerhou toe hulle die aantygings oor Brown gemaak het, het TMZ berig.

Geragos het in antwoord op die aanklaers se bewering dat niemand ooit vir Brown sien gemeenskapsdiens doen het nie, gesê 'n adjunkpolisiehoof van Richmond het gesien hoe Brown die polisiestasie se terrein skoonmaak.

Die prokureur het ook fakture en tjeks ingedien wat toon dat Brown $31 534,70 (sowat R280 00) aan die polisiestasie in Richmond betaal het om sekuriteitspersoneel te verskaf tydens sy gemeenskapsdiensperiode.

Aanklaers in Los Angeles het ‘n regter vroeër gevra om die sanger te beveel om sy gemeenskapsdiens oor te doen ná ongerymdhede glo in dokumente ontdek is wat aan die hof oorhandig is.

Brown was ook in die hof teenwoordig toe Geragos die dokumente ingedien het.

– Volg Nuus24 op Twitter