Stories lóóp oor Tiger
2009-11-30 07:34
Het Tiger Woods se vrou, Elin Nordegren, hom met ’n gholfstok bygedam oor sy beweerde verhouding met ’n kelnerin?
Gerugte is volop ná die ongeluk waarin die wêreld se beste gholfspeler Vrydag in die vroeë oggendure sy lippe gesny het.
“Só baie vrae wat in die lug hang, soos waarheen hy só laat op pad was, en gerugte op die internet blaas net die vure aan,” het ’n bemarkingsdeskundige gister volgens Sapa-AP gesê.
Woods se ongeluk buite sy huis in die eksklusiewe Isleworth-veiligheidskompleks naby Orlando, Florida in die VSA, volg twee dae ná ’n berig in die National Enquirer dat Woods deurmekaar is met ’n nagklub-kelner van New York en dat hulle onlangs saam in Melbourne, Australië, was waar Woods in die Australiese Meesterstoernooi gespeel het.
Die vrou, me. Rachel Uchitel, het die verhouding ontken.
Woods se Cadillac het omstreeks 02:25 ’n brandweerkraan en ’n boom buite sy inrit getref.
Volgens die polisie was Woods se lippe gesny en was daar bloed in sy mond toe hulle op die toneel opgedaag het.
Die plaaslike polisiehoof, mnr. Daniel Saylor, het gesê mev. Woods het die agtervenster van sy voertuig met ’n gholfstok gebreek om hom uit die voertuig te help.
“Dit is ongewoon dat ons nog nie ’n verklaring het nie,” het die polisie gesê. “Dit vertraag net die afhandeling van die ondersoek.”
Die bande van die noodoproep sou gister uitgereik word.
- Die Burger