Stones kook in New York
2012-12-09 11:51
New York – Die legendariese Rolling Stones, wie se groeplede deesdae op 'n gemiddelde ouderdom van 68 staan, het aanhangers Saterdag by die Barclays-sentrum in Brooklyn vir twee en 'n half uur in vervoering gehad tydens die groep se eerste Amerikaanse vertoning in hulle eerste toer in jare.
Die groep vier hulle 50ste bestaansjaar.
"Mense vra ons hoekom ons dit so lank al doen," het Mick Jagger, die groep se voorsanger, op die verhoog gesê.
"Die antwoord is, ons doen dit vir julle."
Jagger was in sy element, en het vir die grootste deel van die vertoning op die verhoog rondgespring in 'n noupassende swart T-hemp en broek.
Een van die hoogtepunte van die vertoning was 'n verskyning deur die sangeres Mary J. Blige, wat saam met Jagger "Gimme Shelter" gesing het.
Die groep het 23 liedjies gespeel, insluitend twee nuwe komposisies. Die grootste deel van die konsert het egter bestaan uit gunstelinge soos "Brown Sugar," "Honky Tonk Woman" en "Midnight Rambler."
Die laaste lied, die treffer "Satisfaction", het die skare van 18 000 mense gaande gehad.
"As jy hou van die Stones, was hierdie die beste vertoning wat jy kan kry," het een aanhanger, Robert Nehring, 58, gesê.
– Volg Nuus24 op Twitter.
- Sapa - AP
