Stil-stil wen dié fliek sewe Baftas
2012-02-14 09:02
Kaapstad. – Die stilfiek The Artist was een van die groot wenners op die Bafta-aand in Londen Sondagaand en het sewe van dié gesogte Britse rolprentpryse verower.
Die gasheer van die glansgeleentheid in die Royal Opera House was die Britse komediant Stephen Fry. Tom Jones het die verrigtinge energiek begin met sy weergawe van die Bond-temaliedjie "Thunderball". Die Britse spioen 007 se 50ste rolprentjaar word vanjaar gedenk.
The Artist, ’n swart-en-wit fliek wat terughunker na die goue Hollywood-era van die stilfliek, het ál die groot kategorieë gewen: beste rolprent, beste regisseur (Michel Hazanavicius), beste oorspronklike draaiboek, beste oorspronklike musiek, beste kostuumontwerp en kinematografie.
Die Frans man Jean Dujardin, wat die hoofrol speel, is die beste akteur.
Hy het Gary Oldman getroef wat ’n gunsteling was vir die Britse spioenasiefliek Tinker Tailor Soldier Spy.The Artist was vir 12 Baftas benoem.
Dujarin het reeds ’n Golden Globe en ’n Screen Actors Guild-prys gewen vir dié rol.
Meryl Streep is die beste aktrise vir haar rol as die gewese Britse premier barones Margaret Thatcher in The Iron Lady.
Dit is Streep se tweede Bafta.
Die vorige was sowat 30 jaar gelede vir The French Lieutenant’s Woman.
Al moes die Engelse byna al hul beeldjies aan die Franse afstaan, kon die Britse Tinker Tailor Soldier Spy darem wen vir beste Britse rolprent en beste verwerkte draaiboek.
Die Britse Senna, oor die F1-jaer Ayrton Senna, is as beste dokumentêr bekroon.
– Volg Nuus24 op Twitter
- Die Burger
