Stevie Wonder kanselleer Israel-konsert

2012-12-03 15:03

Los Angeles – Die legendariese sanger Stevie Wonder het 'n beplande konsert vir die Vriende van Israel se Gewapende Magte gekanselleer nadat verskeie organisasies hom gevra het om nie op te tree nie.

Die 62-jarige sanger sou op 6 Desember by dié organisasie, wat op die been gebring is om diegene wat in Israel se Gewapende Magte dien en die families van gevalle soldate ondersteun, se fondsinsamelingsgala optree.

"Gegewe die huidige en baie delikate situasie in die Midde-Ooste en met 'n hart wat altyd vra vir wêreldeenheid, sal ek nie by die gala optree nie," het Wonder in 'n verklaring gesê.

Wonder het gesê hy sal 'n bydrae lewer aan organisasies wat Israelse en Palestynse kinders met gestremdhede ondersteun.

Die sanger het verder gesê as vredesboodskapper van die Verenigde Nasies (VN), 'n titel wat hy in 2009 ontvang het, "is en was ek altyd teen oorlog, enige oorlog in enige plek".

– Volg Nuus24 op Twitter

- Reuters