Steven Tyler teken glo by Idols
2010-08-19 13:00
Los Angeles - Die 62-jarige hoofsanger van Aerosmith, Steven Tyler, het volgens een van sy Aerosmith-kollegas ‘n ooreenkoms geteken om ‘n beoordelaar op American Idol te word.
Tyler sal een van die drie leë sitplekke op die beoordelaarspaneel volsit, nadat Simon Cowell en Ellen DeGeneres die program verlaat het en Kara DioGuardi glo afgedank is. Randy Jackson sal na verwagting by die program aanbly.
Spekulasie draai nou al weke lank om Tyler en Jennifer Lopez se moontlike aansluiting by Idols, wat ‘n grootskaalse herstrukturering ondergaan om hul kykergetalle op te stoot. Nasionale oudisies is reeds onderweg voordat die tiende seisoen van die reeks in Januarie op televisieskerms sal wees.
Die Fox-netwerk en die program se vervaardigers is bra stil oor die spekulasie, maar die baskitaarspeler van Aerosmith, Tom Hamilton, het die Star-Ledger-koerant in New Jersey vertel dat Tyler wel ‘n Idols-beoordelaar gaan word.
“Steven gaan American Idol doen. Die ink is droog daarop,” het die koerant hom aangehaal.
“Steven is iemand wat daarvoor leef om voor ‘n gehoor te wees. Die mense naaste aan hom weet hoe skerpsinnig en vermaaklik hy kan wees. Ek weet nie of American Idol ruk-en-rol genoeg vir hom sal wees nie, maar dis ‘n geleentheid vir miljoene mense om ‘n ander kant van Steven Tyler te sien.”
Volg Nuus24 op Twitter
- Reuters