Steven Tyler groet American Idol
2012-07-13 09:56
Los Angeles – Steven Tyler het bevestig hy gaan die American Idol-span verlaat.
Die Aerosmith-sanger was vir die afgelope twee reekse van die program ‘n beoordelaar saam met Jennifer Lopez en Randy Jackson, maar hy het besluit om nie vir die 12de seisoen terug te keer nie.
Tyler wil glo weer op musiek fokus omdat hy “te ver afgedwaal” het van sy groep.
“Nadat ek lank en hard hieroor gedink het, het ek besluit dit is tyd om my minnaar American Idol te verlaat voordat sy my mal maak,” het hy in ‘n verklaring gesê.
“Ek het weggedwaal van my eerste liefde, Aerosmith, en ek is terug.”
Steven erken hy “was mal oor elke oomblik” van American Idol, maar hy is nou daartoe verbind om “rock terug te bring” saam met sy groep.
Hy het bygevoeg dat die groep se nuwe album, Music from Another Dimension, op 6 November vrygestel word.
Mike Darnell, Fox se president van alternatiewe vermaak, het in ‘n verklaring gesê: “Dit was ‘n ongelooflike eer om Steven vir die afgelope twee seisoene op American Idol te hê.
“Hy was ‘n uitstekende beoordelaar, ‘n ware vriend en wonderlike mentor vir almal wat betrokke is by die program en ons weet hy sal voortgaan om ‘n groot inspirasie te wees vir mense wat hoop om ‘n Idol te word.
“Ons is baie hartseer dat Steven gekies het om meer op sy musiek te fokus, maar ons het altyd geweet as ons ‘n rock-legende huur sal hy terugkeer na musiek. Ons almal wens hom alle sterkte toe en sal hom enige tyd op die program terug verwelkom.”
– Volg Nuus24 op Twitter
- BangShowBiz
