Steve sê hy sal nie beledig op ‘Idols’
2010-03-19 08:03
Amanda de Lange, Beeld
Johannesburg - Steve Hofmeyr het ’n broertjie dood aan ouers wat dink hul kinders kan sing en dan klink die kind soos ’n kat wat aan sy stert rondgeswaai word.
Maar wanneer hy op 17 April in die Gateway-winkelsentrum in Durban agter die tafel inskuif as ’n beoordelaar vir Idols, sal hy nie beledigend raak nie.
En hy sal ook nie huiwer om te verskil met Randall Abrahams, Mara Louw en Gareth Cliff, sy mede-beoordelaars, nie.
“Ek sal beslis baie reguit wees en my opinie oordra, maar ek stem nie saam met die Randall-ding nie. Hy was al dikwels neerhalend teenoor iemand vir wie ek ’n plek in die musiekbedryf kon sien.”
Hofmeyr sê hy is baie opgewonde oor die geleentheid.
“Ek is baie gelukkig as ek kan bydra tot die ontwikkeling van jong, potensiële sangloopbane. Maar om die talent te beoordeel is vir my belangriker as goeie TV, daarom gaan ek nie neerhalend wees nie.”
Hy het sy eie lysie waarvolgens hy sal beoordeel, sê hy. “Die liedjiekeuse en genre is net so belangrik as talent. En daar moet ’n mark wees vir hul musiek in Suid-Afrika.”
Omdat hy self ’n sanger is, is voorkoms nie vir hom belangrik nie.
“Maar dit is vir die mark belangrik. Daar is platemaatskappye wat vir jou sal sê hulle kan jou nie vat nie, maak nie saak hóé goed jou stem is nie, omdat jy nie die regte voorkoms het nie.
“Dan is daar natuurlik die simpatie-stem. Dink maar aan Susan Boyle van Engeland. Daar is ’n sekere nederigheid by party mense wat hulle baie gewild maak. En as jy arrogant wil wees, moet jy seker wees jy kan dit goed bestuur.”
Hofmeyr, wat ook al as gasbeoordelaar in Supersterre opgetree het, sê hy is baie opgewonde om weer die geleentheid te kry om aan jong talent te slyp.
Hofmeyr meen ook dat daar nog baie ruimte in die Afrikaanse mark is vir nuwe talent.
“In die Afrikaanse mark is sterk sangers nie noodwendig belangrik nie. Dit is mense wat ’n following kry omdat hulle aan jou hart raak.”
- Beeld