'Steve, jy’t my te ver gedruk'
2010-04-16 08:34
Dorette Marais
Kaapstad - Die vrou met wie Steve Hofmeyr in die geheim vir 14 jaar lank ’n verhouding gehad het, het onlangs op die sosiale netwerk Facebook beweer dié sanger maak haar lewe ‘n lewende hel.
Christina Bergh (32) het op beide haar eie Facebook-profiel en op Hofmeyr se aanhangersbladsy verskeie kere Hofmeyr beledig tot so 'n mate ander aanhangers haar daarvan beskuldig het dat sy haar “vuil wasgoed in die publiek was”.
Bergh meen Hofmeyr sleep haar naam deur die modder, en dat hy haar te ver gedruk het.
“Vir die intelligente man wat jy blykbaar is maak jy vrouens uit as hoere waarmee jy gewilliglik in die bed gespring het. Ek dink jy moet jouself inboek vir seksterapie! Maar nie eens dit sal help nie. Jou siel moet gered word van die duiwel. Hou op om my naam deur die modder te sleep,“ het sy Donderdag op Hofmeyr se aanhangersblad geskryf.
In ‘n ander inskrywing wat sy Woensdag gemaak het meen sy Hofmeyr is net so skuldig aan wat moontlik na dié twee se buite-egtelike verhouding verwys.
“Watter man noem ‘n vrou ‘n hoer as hy self net so skuldig is. Jy gaan nie wegkom hiermee nie Steve. Jy is besig om my lewe ‘n lewende hel te maak met jou oppervlakkige kinderagtige opmerkings. Ek sal bid vir jou siel,” sê sy.
Dis nie bekend wat aanleiding gegee het tot Bergh se uitlatings nie, en Hofmeyr het ook nie op enige van haar kommentaar geantwoord nie.
Bergh, ‘n eiendomsagent, het verlede jaar aan Huisgenoot vertel dat sy Hofmeyr by ’n konsert in Pretoria ontmoet het toe sy as matriekleerling van 18 saam met vriendinne sy handtekening gaan vra het.
Sy het toe gesê dat sy en Hofmeyr mekaar net ’n paar keer per jaar gesien het.
Op haar eie Facebook-blad het Bergh op 17 Februarie vanjaar gesê dat sy besig is om ‘n boek te skryf wat aan die einde van vanjaar uitgegee sal word.
“Jy het my te ver gedruk. Jy het geen reg gehad nie,” lees die mees onlangse inskrywing op haar eie Facebook-blad.
-Nuus24