Steve en seun saam op lys topverkopers
2010-07-27 06:51
Johannesburg - Vir die eerste keer in die bestaan van die amptelike weeklikse lys van top-20-CD-verkopers in die land is ’n pa en sy seun saam op die lys met verskillende CD’s.
Steve Hofmeyr se jongste CD, “Duisend en een”, is reeds 12 weke op die lys van topverkopers en dit het al selfs die eerste posisie beklee.
Vandeesweek beklee dié CD die sesde plek.
Hofmeyr se seun, Armand Hofmeyr, se debuut-CD is omtrent ses weke ná sy pa s’n uitgereik.
Dit het gister sy verskyning op dié lys gemaak in die 20ste plek. Die CD se titel is “Foto’s en briewe”.
Die amptelike top-20-lys sluit nie net plaaslik vervaardigde CD’s in nie, maar ook alle CD’s wêreldwyd wat hierheen ingevoer word.
Steve sê op sy webwerf dit is vir hom baie lekker om saam met Armand te toer om die CD’s te bevorder.
Hy is trots op sy seun en waarsku hom tong in die kies dat “ek nou ernstig aan jou gaan begin skaaf”.
- Beeld