Steve en Janine wil trou ná egskeiding
2011-12-10 09:01
George. – Die Afrikaanse superster Steve Hofmeyr gaan met sy geliefde Janine van der Vyver trou sodra sy egskeiding gefinaliseer is.
Hy en Van der Vyver het in September verloof geraak, maar hy is nog wetlik met Natasha Sutherland getroud.
Hofmeyr tree Sondag saam met Bok van Blerk op ’n Afrikaanse musiekfees op wat op die gholflandgoed Fancourt gehou word.
Hy kom Sondagoggend hier aan en bring Janine saam. “Ons sal die troudatum gee sodra die skeidatum gefinaliseer is,” het hy Vrydag aan Volksblad gesê.
Hofmeyr en Van Blerk sou in Oktober aan die konsert deelgeneem het, maar dit moes weens reënweer uitgestel word.
’n Opgewekte Hofmeyr het gesê hy sien daarna uit om na George te kom. “Ek is baie opgewonde.”
Janine kom saam. “Ek kom vir haar die Outeniekwa wys.”
Dit gaan goed met hom. Die Afrikaanse rolprent Platteland waarin hy saam met Van Blerk speel, doen baie goed by die loket. “Dit is nie ’n kunsrolprent nie, maar ook nie ’n bubblegum-fliek nie. Dit is so tussenin.”
In die aanloop tot Kersfees het hy ’n spesifieke Kersfeeswens dat die uitgeskopte ANC-jeugleier, Julius Malema, moet terugkom.
“Ek is so verveeld, ek kan vrek sonder hom.”
Dit sal die eerste keer wees dat hy van sy nuwe liedjies op die Tuinroete kom sing. Hy gaan ook ’n paar ou treffers, soos Pampoen en die Blou Bul, sing.
Van Blerk het gesê hy sien ook baie uit na Sondag se konsert. Hy gaan ná die tyd op George agterbly om gholf te speel en te ontspan.
Op Saterdag 17 Desember is hy op die verhoog op Stilbaai, op 19 Desember op Jeffreysbaai en op 20 Desember op Mosselbaai. Daarna gaan hy in Mosambiek vakansie hou.
Hy en Hofmeyr kom baie goed oor die weg. Sondag is hulle saam op die verhoog, maar hulle kry nie deur die jaar baie tyd om saam op te tree nie.
Van Blerk het gesê daar is ’n groot oplewing in Afrikaanse musiek.
Ondanks die moeilike ekonomiese tye, luister mense nog na Afrikaanse musiek.
Volg Nuus24 op Twitter.
- Volksblad