Star Trek-akteur se seun vermis
2010-02-23 02:00
Los Angeles – Walter Koenig van Star Trek se akteur-seun het verdwyn terwyl hy by vriende in Kanada gekuier het.
Sy familie het Sondag desperaat gevra dat enigeen met inligting oor hom dit aan die Vancouver polisie sal bekendmaak.
Andrew Koenig, 41, wat die rol van “Boner” vertolk het in die 1980s televisiereeks Growing Pains, is laas op 14 Februarie in Vancouver gesien nadat hy volgens bure al sy besittings in Los Angeles verkoop het.
“Hy was depressief,” het sy pa, wat ‘n graad in sielkkunde het, aan die plaaslike ABC televisiestasie Kabc gesê.
“Hy probeer om op die been te kom met sy besigheid en hy werk al ‘n lang tyd daaraan.”
Die 73-jarige Koenig, wat die rol van Pavel Chekov in die oorspronklike Star Trek reeks vertolk het, het gesê dat dwelms nie ‘n kwessie was nie.
Andrew, wat sy ouers laas op 9 Februarie gekontak het, het nooit opgedaag vir sy vlug na Los Angeles wat ‘n week later was nie.
Koenig het gesê dat hy en sy vrou Dinsdag na Vancouver sal vlieg om te help met die soektog.
Andrew se vriende in die vermaaklikheidsbedryf het ook Twitter-boodskappe uitgestuur om inligting oor sy verdwyning te probeer bekom.
- Reuters