Stap lekkerlooproete vir U2-konsert
2011-02-11 07:59
Theuns van der Westhuizen
Kaapstad - Tienduisende musiekliefhebbers en pretsoekers gaan die Kaap se strate volgende Vrydagaand oorneem.
Meer as 70 000 mense gaan per trein en bus en te voet na die Kaapstad-stadion opruk vir die supergroep U2 se 360°-konsert.
Die organiseerders van die konsert en ander vermaak verwag dat tot 100 000 op die lekkerlooproete sal saamtrek.
Dié keer gaan daar nie, soos tydens die Wêreldbeker-sokkertoernooi, blêrende vuvuzelas op die lekkerlooproete wees nie, maar musiek van U2 en muurpanele wat tonele van die groep se optredes uitbeeld.
Die pret en plesier begin reeds om 15:30 op die roete van die stasie na die stadion. Die hekke van die stadion open om 16:30 en die konsert begin stiptelik om 19:30.
Natalie Perreira van Celebrity Services Africa, die onderneming wat die roete vir die konsert bestuur, het gesê die lekkerlooproete vorm ’n integrale deel van die konsert.
Groot muurpanele wat U2 se geskiedenis en elemente uit hul top-albums uitbeeld, sal langs die roete opgerig word. Beelde uit hul video-opname vir “Streets With No Name” sal ook uitgebeeld word, terwyl artieste op stelte, musikante en ander vermaak oral aangebied word.
Lesley de Reuck, stadiondirekteur, het gesê die roete sal nie net die veiligste en maklikste manier wees om by die stadion te kom nie, maar dit sal aan almal ’n unieke ervaring van Kaapstad bied.
Pieter Cronjé, woordvoerder van die Kaapse stadsraad, het by navraag gesê konsertgangers sal ook weer met gratis pendelbusse by die stadion kan kom.
Die raad voorsien ook ander munisipale dienste vir die konsert, maar dit sal nie die belastingbetaler se sak raak nie. “Die stadion word vir R1,2 miljoen verhuur en die raad raam dat hy ’n netto-wins van R500 000 sal maak.
“Konsertgangers word aangemoedig om openbare vervoer te gebruik om te verseker dat hulle betyds by die stadion kom. Metrorail reël ook bykomende treine om mense ná die konsert by die huis te kry.”
Veilige en gratis parkeerplekke word verskaf by die stasies van Athlone, Brackenfell, Claremont, Kuilsrivier, Mitchells Plain, Ottery, Retreat en die Strand.
Parkeer-en-ry-geriewe sal ook teen ’n klein bedraggie beskikbaar wees in Oostersee en by die Hoërskool Settlers, by GrandWest in Goodwood, Ratanga Junction in Century City en in Vishoek.
Peter Sole, bestuurder van die munisipale vervoernetwerk, het gesê pendeldienste sal ook van parkeer-en-ry-geriewe in Houtbaai, Kampsbaai en die Universiteit van Kaapstad aangebied word.
“Geen parkeerplek sal by die stadion en in die omgewing beskikbaar wees nie, en in die middestad sal net beperkte plek wees.”
Vervoerdienste-inligting kan verkry word by 008 006 56463 of www.capetown.gov.za.