Springbok Nude Girls op toer met nuwe album
2011-11-05 07:59
Johannesburg - Die Springbok Nude Girls is een van die land se grootste suksesverhale op die gebied van oorspronklike alternatiewe rock.
Sedert Arno Carstens (sang), Francois Kruger (tromme), Theo Crous (kitaar), Arno Blumer (baskitaar) en Adriaan Brand (klawerborde en trompet) in 1994 begin musiek maak het, het ’n indrukwekkende 15 Nudie-uitreikings verskyn, ten spyte van ’n tydperk van vyf jaar wat hulle nie saam musiek gemaak het nie.
Die Nudies is nou terug met ’n nuwe, kort album van ses snitte, getitel Apes with Shades.
Toe hulle in 1995 hul debuut, Neanderthal 1, die lig laat sien het, het hulle die hele album in net ’n week opgeneem.
Hulle het hierdie maniese formule gevolg toe hulle in Junie vanjaar op die eiland Wight aan die Engelse kus bymekaar gekom het waar hulle ’n week lank saam gebly, geskryf en opgeneem het as ’n soort musiek-eksperiment.
Carstens sê in ’n persverklaring hulle het op die eiland gaan uitspan met ’n houding van “kom ons kyk wat gebeur”.
“Ons het die grense getoets van wat veronderstel is om moontlik te wees en ek dink die resultaat is interessant.”
Aanhangers kan Apes with Shades aanskaf tydens hul toer, in Look & Listen of aanlyn by die Nokia Ovi-winkel.
* Die Springbok Nude Girls tree op 19 November om 19:00 op in Aandklas, Birdstraat, in Stellenbosch. Kaartjies by die deur kos R50. Skakel 021 883 3545 met navrae.
* Hulle tree op 26 November om 19:00 op in die Zula-kroeg, Langstaat, Kaapstad. Skakel 082 445 5332 met navrae.
– Volg Nuus24 op Twitter
- Die Burger