Sportjoernalis terug by werk ná tugproses

2012-11-22 07:30

Johannesburg – Die sportaanbieder van die eNCA-nuuskanaal, Lance Witten, is terug in sy pos nadat hy geskors is oor uitlatings wat hy op Twitter gemaak het.

"'n Dissiplinêre verhoor het plaasgevind en die voorsitter het gevoel dat Witten volle verantwoordelikheid aanvaar vir sy uitlatings, berou toon en erken het dat die tweets onvanpas was," het die nuuskanaal Woensdag in 'n verklaring gesê.

Witten het twee weke gelede oor die dood van 'n vrou by die Linkin Park-konsert in Kaapstad getweet: "Linkin Park is so badass, people are dying to see ‘em”.

Die vrou is dood en 19 mense is beseer toe steierwerk buite die Kaapstad-stadion, waar die groep opgetree het, omgewaai het.

Witten het 'n skriftelike waarskuwing gekry en is beveel om opleiding in sosiale media te ontvang.

Die nuuskanaal het gesê hy is tevrede met die interne tugproses en beskou die saak as afgehandel.

Volg Nuus24 op Twitter.