Spielberg wéér met leë hande huis toe
2013-02-25 14:10
Los Angeles – Die Hollywood-veteraan Steven Spielberg het vir die tweede jaar in ‘n ry met leë hande by die Oscars weggestap, ten spyte daarvan dat sy fliek Lincoln die meeste benoemings gehad het.
Spielberg se Lincoln het 12 benoemings by vanjaar se Oscars gehad, insluitend beste rolprent en beste regisseur vir Spielberg.
Die rolprent het egter net twee goue beeldjies ingepalm. Daniel Day-Lewis is as die beste akteur aangewys, terwyl die produksie-ontwerp-span ook erkenning gekry het. Spielberg was nie vir een van dié twee toekennings op die verhoog nodig nie.
Ben Affleck se Argo is as die beste rolprent vereer, terwyl Ang Lee die gesogte Oscar vir beste regisseur voor Spielberg se neus weggeraap het vir sy werk aan Life of Pi.
Dit volg ná Spielberg se oorlogsdrama War Horse, wat verlede jaar in ses kategorieë benoem was, nie met een goue beeldjie vereer is nie.
Die 66-jarige het in 1999 laas ‘n Oscar gewen vir Saving Private Ryan, toe hy as beste regisseur bekroon is.
Affleck, die eerste regisseur sedert Driving Miss Daisy in 1990 om die beeldjie vir beste rolprent te wen sonder dat hy ook as beste regisseur benoem is, het hulde aan Spielberg gebring tydens sy aanvaardingstoespraak.
“Ek wil erken dat Steven Spielberg ‘n genie is en dat hy ‘n manjifieke talent onder ons is,” het Affleck gesê.
Spielberg se rolprent was die groot gunsteling om dié toekenning te wen.
– Volg Nuus24 op Twitter
- Sapa - AFP
