Speletjie kom, al is Tiger nie nou gewild
2010-01-06 12:13
Chicago – EA Sports, ’n vervaardiger van sportvideospeletjies, gaan steeds ’n Tiger Woods-aanlynspeletjie bekend stel ondanks die gholfster se tanende gewildheid weens ’n owerspel-skandaal.
Peter Moore, EA-president, het in ’n maatskappy-blog gesê dat hulle vandeesmaand die speletjie Tiger Woods PGA Tour Online, wat verlede jaar vervaardig is, gaan bekend stel.
“Ons verhouding met Tiger was nog altyd gesetel in gholf,” het hy geskryf.
“Ongeag wat in sy persoonlike lewe gebeur, is Tiger Woods steeds een van die grootste atlete tot nog toe.”
EA se optrede kom vier dae nadat AT&T Inc. hul borgskap van Woods opgesê het. Dit volg nadat die wêreld se eerste sport-miljardêr vasgevang is in bewerings van verskeie buite-egtelike verhoudings ná ’n ligte motorongeluk buite sy huis op 27 November verlede jaar.
Woods (33) het sowat $100miljoen (sowat R730miljoen) per jaar uit borgskappe verdien voordat dié bom gebars het.
Hy het op 11 Desember erken dat hy ontrou was en gesê dat hy ’n blaaskans van gholf neem om te werk aan sy verhouding met sy Sweedse vrou, Elin Nordegren, by wie hy twee kinders het.
Die videospeletjie is een van EA Sports se eerste aanlynpogings. Dit gaan vir eers tydens ’n toetsfase gratis beskikbaar gestel word.
- Reuters Life!